Hong Kong Hell

趕客設計

2009-08-26T10:32:00.002+08:00

呢類風格的平面廣告，如果賣的產品是桑拿骨場浴室、工商及市場學管理課程、電腦動漫婚紗展、回鄉証即影即有照、大學迎新週或政府文康活動，我覺得很正常，唔會開個 post 論盡一番。但現在該廣告所賣的，竟然是一個平面設計課程，而且是經由「國際設計師網絡」
http://idnworld.com/promo/swp09/ 發放（連結已被離奇抽起！），那就未免有點兒過份前衞了！（恕我保守。）

其實，今時今日，大家都知道是甚麼世代，掛羊頭賣狗肉已經不是甚麼道德課題，而是一種流行銷售伎倆。講一套做一套，不要緊，最怕那些連掩飾都懶的人。社會雖正在愚昧化，但其實未曾正式愚昧完成，溫水煮蛙都會用慢火啦，唔該唔好連嗰少少煤氣都慳好嘛？！？！不求你貨真價實，但求你畀少少誠意。

平面設計的世界真的很遼闊。All the very best and good luck to 嗰啲將會報讀呢個彩虹 course 嘅莘莘學子！

全文轉載自《中央聖學子》

咁o岩得咁橋無橋-美白篇

2009-08-17T13:38:00.002+08:00

美肌の誌嫩白緊緻納米面膜
年份: 2009
製作單位: 不詳

セツナレンサ RADWIMPS PV
年份: 2006 (?)
製作單位: 不詳

口痕友話：我唔覺似囉，邊忽似? 一個鬼婆一個唐人、一條疊左中文字一條乜都無、一個Sell Product一個Sell歌、一個條女發哂光同埋髮型都好大分別、樹又唔同品種、啲骨牌轉出嚟個Angle都唔一樣、兩條片個色Tone亦都好唔同、Director又唔係同一個人、仲有(繼續列舉出一百樣分別...)

咁o岩得咁橋無橋-沙灘波篇

2009-08-10T16:15:00.001+08:00

詩琳2009 TVC
年份: 2009/八月
製作單位: 不詳

Bavaria Beer TVC
年份: 不詳
製作單位: 不詳

咁o岩得咁橋無橋-天堂有料

2009-08-07T13:35:00.001+08:00

我很醜但我無偷野

咁o岩得咁橋無橋-買鞋篇

2009-08-06T21:05:00.012+08:00

紐約時裝品牌Halston Fall 09 Promo
年份: 2009/二月
製作單位: Colonel Blimp (London)

海港城2009鞋鞋聲廣告
年份: 2009/八月
製作單位: Allrightsreserved

*條片於youtube內被一刪再刪...無辦法...只有cap圖

心情好抄考,心情唔好抄考,失戀後抄考,傷風感冒抄考,瘦身後抄考,抄考, 唔想抄考時抄考,紅色暴雨抄考。十個話自己做Creative, 九個抄考

咁o岩得咁橋無橋-電器篇

2009-08-05T19:03:00.004+08:00

ZUNE 4GB Red TVC
出版年份：(未知)
Agency: (未知)

容糟兒百老匯2009 TVC
出版年份：2009
Agency: (未知)

咁o岩得咁橋無橋-錯亂篇

2009-08-05T18:44:00.013+08:00

椎名林檎《錯亂》
出版年份：2007
Composer: 椎名林檎

Fancl升級版 MCO 納米卸粧液
出版年份：2009
Production: off-lo-hi ltd.

不得不說，康港講告BGM一直愛改幾粒音就抄考當原創。不過如此這般幾乎毫無改動但又要怕似原版於是扭少少側屬罕見......

Coco After Retouch

2009-06-25T10:59:00.002+08:00

今朝睇報紙，見到《少女香奈兒》揸住支筆讀起書來，很是感動（左圖）。由吸煙少女搖身一變滿有書卷氣，若香奈兒要搬到梅窩，居民定必熱烈歡迎。一張電影海報，可以玩到有「劇情」，不愧為「創意香港」。搞到學子都手癢癢，唔得，等我創作創作一番先！（右圖）

全文轉載自《中央聖學子》

Coco Before Retouch

2009-06-18T17:01:00.003+08:00

PhotoHunt! 找出一處不同。(答案見下文)

【明報專訊】描述名牌女裝香奈兒（Chanel）創辦人一生的電影《少女香奈兒》日前在本港上映，在該劇的宣傳海報上，女主角法國女星柯德莉塔圖（Audrey Tautou）原本是手持香煙，但衛生署表示，該署已根據法例勸喻電影發行商不要展示「煙草廣告」，宣傳海報上的柯德莉塔圖的香煙亦被刪走。據悉，衛生署正徵詢律政司意見，考慮作出檢控。

指影星吸煙似推廣或會檢控
衛生署表示，早前曾接獲多宗查詢，了解廣告是否違反《吸煙（公眾衛生）條例》中的禁止煙草廣告條文，署方發言人表明，根據法例，如果任何廣告載有以明示或默示的方式誘使、建議或促請任何人吸煙；或描述吸煙，形成推廣或鼓勵效果；或提及吸煙，已屬「煙草廣告」，不論廣告是經何種媒體展示也屬違法，一經定罪，最高可被判罰款5萬元。

該署已對電影發行商作出勸喻，發行商回應稱已將電影海報上的香煙刪走。據悉，由於海報展示影星吸煙形象，難以排除會造成鼓勵市民吸煙的效果，因此衛生署正就是否作出檢控，徵詢律政司意見。

在該片的宣傳海報上，女主角原本躺在脇上、右手持香煙。記者昨日在港鐵沿線所見，海報已經過處理，香煙被刪走，女主角右手變成無端舉起並伸出兩指。

節錄《2009年6月17日明報專訊》

全文轉載自《中央聖學子》

Say No to 撈？！

2009-02-20T02:01:00.005+08:00

撈
〔粵音〕Lou1
〔解一〕從水中取出東西。如：「撈魚」、「撈蝦」、「打撈」。唐．舒元輿．坊州按獄詩：「山禿逾高採，水窮益深撈。」
〔解二〕獲得、以不正當的手段取得。如：「撈油水」、「他趁機撈了一筆。」

據解釋二的意思，不難令人聯想起「撈偏門」、「撈粉」、「撈女」、「襟撈(金色勞力士)」、「撈過界」、「拗撈」等地道用語。用「撈」字來形容自己的 career，相信一般家長或稍為受過中等教育的都不會太鼓勵或接受；始終，「撈味」呢家嘢，除咗拍戲扮江湖人士，好似都唔係咁馨香。

本港職業訓練局 (VTC)，最近勇敢地 launch 咗個 website，名為
《LOAD面撈出個未來》，URL 為 http://www.vtc.edu.hk/loadme/。(「load me」？！幸好冇譯作「老味」。) 網頁看來是以一個 online 小 game 來 promote 其幾個主打課程。玩法簡單，首先玩家要選定一個代表某個「專業」的人物造形公仔，然後 upload 自己的頭像圖片，程式便會將頭像圖片套進人物造型公仔的面部，玩家隨即「變身成為夢想好工主角，投身社會最前線！」，在動畫片段中載歌載舞，絕對叫人嚮往兼陶醉。

兩年前，令人眼前一黑的《知 . 專 . 里程 Fly High》MV，VTC 已經露過一手，今次《LOAD面撈出個未來》實在有再下一城之效！上次「MK文化」深入民心，對準 target audience；今云對象層面更廣，有盡攬各行各業撈家之勢。對搵食至上的港人而言，實在非常體貼。正所謂：「飽暖思夢想」，VTC (或IVE)，若冠以「康港夢工場」之名，理必當之無愧！

講番《LOAD面撈出個未來》。Upload 自己塊面整造形公仔，稱之「LOAD面」，明白。從徬徨市井青年觀點出發，用「撈出個未來」，都明白。但用一句沒標點的「LOAD面撈出個未來」做 slogan，句子意思就有點兒怪怪？！中文語理通嗎？！學子中英文都麻麻，真係要報報 VTC 啲 course 進修一下，賜教賜教。「Load」「撈」「Low」「No！No！」，食字呢家嘢，真係港人 favourite，在創作過程中，一旦阿某某惗到個「食字gag」，大家都往往欲罷不能地採納，覺得這就是創意，這就是設計。除了優質上乘的，康港幾不可思議嘅 idea 都有可能出街，而且多出自巨型機構 (如電仍)，甚至自稱的教育機構。VTC 先後已十分前瞻地身教了我們。還有，VTC 亦貫徹其創作風格 –– 縱使條橋麻麻構思空泛，一於技術效果大龍鳯製作搭夠，務求觀眾報以一聲「嘩~ 點整㗎？！」為目標。(有志走呢種路線嘅同學，不妨惗惗 VTC 嘅 IVE 啦！)

來年 2010，成蟲大哥代言的「霸王設計學院」就會如「敵視嚟樂園」般登陸康港。到時康港設計教育界定必有一番龍爭虎鬥，相信不比澳門賭業興旺兼百花齊放。希望到時大家都可以喺激烈競爭中襟撈襟撈啦！！！

鳴謝：丸氏報料

全文轉載自《中央聖學子》

和記 Gundam

2008-11-03T18:10:00.009+08:00

Title: Gundam True Odyssey “To Another World of G.”
Agency: McCann Erickson Japan Inc.
AD&CD: 布目幹人宮下正夫
Copywriter: 斉藤芳弥
Date: 2005?

Title: 和記寛頻 100M 變身組合 (TVC 仲加入 Iron Man 元素呢！)
Agency: ?
AD&CD: ?
Copywriter: ?
Date: 2008年10月

... ... ... ... ... ...

「每個人係自己崗位上！
盡自己本份！發揮所長！
就係對國家的一份貢獻！」

(正在寫這篇小文時，電視機送上呢幾句，再加上國歌。吹脹。)

鳴謝 DOM 的報料

... ... ... ... ... ...

家常抄考重溫：
口水創意 (2005)
口水創意 2 之抄考？ (2007)
家常抄考兩則 (2007)
熱血 ‧ 冷眼 [01] (2008)

(全文轉載自《中央聖學子》)

狗臉的歲月

2008-08-06T20:21:00.002+08:00

不如易名「鐵達尼」

2008-03-04T02:31:00.001+08:00

愚憎 + 小超人 + 超速林 + 羊生 + 陳智能 + 電訊仍痾 + 微硬 + HP + 啪 ko + Many + 淋狗 + 醫神 + 聾呼 + 器官陳 + 天水圍 ... ... 會等於「天比高」嗎？看過呢幾段片後，腦海總是出現「鐵」「達」「尼」三個字。

一個不折不扣去學術倡實戰的商辦職業培訓學師中心，跟官辦歷史悠久的職業訓練局課程性質無大異 (可能更不用讀書寫字上體育堂)。「天比高」www.skyhigh.hk 跟之前 IVE 的 www.flyhigh.tv (現在網頁已摺了) 網址命名又如斯相近，真係英雄所見略同 (希望命運不同啦)，證明康港教育培訓業勢頭很強。學子一直不反對職業培訓式的設計或創意產業課程，令失學失業失救青年有機會學一技旁身，自食其力，由負變正，的確是善舉。反感的是，那種堂皇的偽善，那種真實的 fake hope，那種扭曲了的價值觀，那種表面不容易看到的破壞。

在康港，近年打正旗號販賣創意的巨型企業單位及名人 (如「即刻狗凌衫」、「四甲」、「淋狗」等)，一而再再而三的被揭發疑似抄襲，未被揭發或不抄的「原創」就肉酸劣質到可以改寫設計史 (如「仍痾格仔撈稿」、「器官沙龍」等)。不講創作，看看眾社會賢達伙伴們過往及近年對社會作出的「貢獻」，真係不得不叫我們要好好想一想本地未來棟樑的將來。

設計、創意產業教育培訓娛樂圈化，最憂心的莫過於一眾日日標榜實戰、設施好、認受性高、出路好的官私立學店們。有嘢學、有錢收、有得玩、有明星睇、有見街嘢做 ... ... 最攞命係，有眾學店皆賣剩無幾的「創作人身份優越感」，認真吸引。商苔出手，神明般的演詞，近乎宗教信眾的迷戀，很難寄望讀書少用腦少的年青人有能力抗拒 (尤其甚至以為淋狗是設計師的小羊牯們)。鞋油落盡的托腳演講結尾的一句「軟硬係我哋最引以為榮嘅出品」，真係總結晒「天比高」的宏願和視野。一件半件本土成功商品，難道就足以榮起來？你重仲係八十年代麼？

康港創作氛圍有今日，除咗熱搞西九的官府外，最大功臣就正正係上述嗰班「社會賢達」和「傳 / 人媒工作者」，是不是賊喊捉賊，現時不敢講，始終肯花幾千萬搞旺一個天水圍停車場 (如屬實)，又似乎眾志成城，是可嘉的。

(全文轉載自《中央聖學子》)

有些屎是沖不走的

2008-03-02T11:59:00.004+08:00

最近不斷收到業界友好傳來的招職link, 內容是關於行內Free Pitching的問題。

我個人一直十分反對Free Pitching(中文原來叫「無償競稿」，真係橋口又柵手，不如叫免費試玩算)，因為十年前打第一份工做素人的時候已經領教過Free Pitching的古惑陰濕。話說當時的老闆在切雞界都算略有名氣，公司專做cooperate job, 以C.I.和年報為主，不過到我加盟的時候，公司某程度上已經踏入苟廷殘存、商場poster萬零蚊貨仔都要接的階段。聽老前輩講老闆以前都風光過，於切雞上亦的確有啲料到(自問那一年junior生涯亦真的偷到唔少師)，可惜興趣太多，閒時愛把時間花在玄學上頭，玩物喪志，最終公司越做越霉。那一年眼見公司生意越來越少，班A.E.日日對住部PC機玩接龍，個個手停口停，老闆終於要親自跑客，然後又俾佢跑到幫某大地產商做年報Pitching，當時老闆怕爭唔贏，史無前例地肉緊(明顯地，術數都幫唔到佢測兇吉...)，公司三個designer晚晚燃燒小宇宙，每人要嘔一set layout俾客，由於人手不足，小弟區區一個junior當時都居然有本事被老闆點名獨自handle一set layout。然後大日子到，老闆著西裝gel行個頭手拎portfo袋，跟A.E.在晴朗的一天出發，上行子彈搵客做presentation, present完，之後等call。

該地產公司最終沒有揀選我們任何一個layout，換言之我們做不成這單生意。然後過了大約半年，該地產公司的年報出來了，無論idea和layout都跟小弟當時的layout餅印一樣，事情再明顯不過 — 客戶找了一間production house然後照抄我們的layout。老闆當時激到幾乎爆血管(除了玄學，老闆亦有玩氣功，我估當時他應該幾接近歐陽峰的經脈逆轉狀態)，專登為這件事開了個會，怒斥這種行為之可憎可恥，然後便燒到HKDA(康港切雞屍怯會)果疊，狂插DA名為協會但從無做過一件維護切雞從業員利益的事、「剩係識攪個award，有乜用唧?!所以我呢幾年唔隊獎就係咁解!!」。(天地良心，我夠膽佢老闆並非酸葡萄心理，公司書架有一極殘舊clear holder, 滿滿一本都攝滿HKDA的cert，證明老闆的確有過他的fifteen minutes)

輾轉十年有突，舊公司早在迎千禧前已經對摺，HKDA現在才做嘢，未免太遲。不過，我認為最大問題並非遲早問題，舊公司執笠亦跟那樁free pitching無關。而是用某種手段去抵制free pitching, 到底是否必需是否有效？

據我觀察，在康港做切雞的切雞屍，經常會不自覺落入兩種危險的思考模式：認為「顧客永遠是錯的」，以及有「很想改變世界」的想法。關於前者，幾乎可以說是無可避免 — 橫蠻無理、bad taste、自以為了解顧客口味的客戶簡直是壓倒性地多，切雞屍對客戶的要求感到反感變得理所當然，「顧客永遠是錯的」的想法於是日漸形成。但換個立場想想，切雞屍又有幾多個是對的？又有幾多個是合規格的？自問認識不少臥虎藏龍，寂寂無名的高手，但認識更多但求搵餐晏仔、每日生產垃圾之輩。假設一個項目找來十間公司Pitch但十個都交垃圾，你叫人那筆「競稿費」點會俾得順氣？我想說的是，再苟纏於Free Pitching的問題某程度上已經不合時宜，現在最逼切的問題其實是：太多叫designer的所謂切雞屍。入場券門檻太低，拿一張cert實在太容易，海綿體老頑同之流教人software都夠膽話自己教切雞，攪到整個行業technician多designer少，切雞師的專業性其實含糊到爆，既然醫院都會打錯針，客戶對切雞屍的能力抱有懷疑，我倒覺得十分合理。(喂，講告傷會都疑似抄嘢俾人搵到源頭斷正啦!)

關於後者，今趟HKDA某程度亦體現了這種想法 — 用一種近乎橫蠻的手段去建造自己心目中的烏托邦。這種「很想改變世界，你要跟我的方法玩」的想法，其實幾不切實際，那種態度更加讓人未出發先反感 — 這亦是讓大部份客戶覺得切雞屍有Artist脾氣的主因。

Eric Chan Design設計總監陳超宏 ( Eric ) 在訪問中說：「簡直像回到10年前的水平，還膽敢自稱國際大都會。」皆因以前企業懂得起用符合公司理念的設計師，現在則隨便找一人負責設計，「『無償競稿』哪會產生好作品，根本是一場大龍鳳。」

簡直入錯班房教錯書，對錯題目寫錯字。香港水平大倒退，我相信跟Free Pitching冇親戚關係。(敦倫2012奧運會徽算不算樣衰？我就打死唔信係free pitching的結果!)「讓設計界見到藍天白雲」？咪玩啦。當康港充斥劣質technician切雞屍、當毛冷台飯汁劇依然在繼續助長香港人的壞品味、當報紙頭版連續二十一日講淫照，我不覺得世界會因為沒有free pitching而變得更美好，更妄想見到藍天白雲比堅尼。

正如一個之前跟我爭論Free Pitching是對是錯的朋友所講，香港是自由市場，總有一群人是心甘命抵去Free Pitching的，否則這個問題根本不會死唔斷氣，但每個人做生意手法不同，又唔係偷唔係搶，為甚麼要攪一套甚麼指引出來多事幹? 我重申一次我是對Free Pitching非常反感，亦不曾參予任何Free Pitch。但我更反對HKDA今次的做法。現實一點，的起心肝尋找問題的源頭，HKDA要做的實在還有太多太多。

若衫公德在《爆粗Band友》第四期的一句對白。有些屎的確是沖不走的。

相關網址：
-Give pitch a change
-康港切雞屍怯會官網
-康港精神巧合到暈

穿尚濃

2008-01-15T11:42:00.000+08:00

昨天到了我狗靈三.com，看到裡頭一些與狗靈三有點關係的人仕撰寫的blog。
狗靈三blog

請留意其中第二行第二位仁兄。
第二行第二位仁兄

村上隆作品

Kaikai Kiki Co. 村上隆官方網站

越scroll越唔對路....咦~咦.....村......村......村上隆(隆隆隆隆~~~~~)?!!?!??!!?!?!?好足吓喎!!!大家可以俾D時間欣賞吓，精彩，睇到嘩嘩聲。(好似連個logo都有D抄"奶")

"半個插畫人，半個廣告人，意外跌入點線面的後花園，從此努力開發令人快樂的作品，而且很討厭一天只得24小時！"

追查此位仁兄仲有私人網頁。
第二行第二位仁兄的私人網頁

有消息佢遲吓仲會推出figure...................香港..........再見。

唱片封套怪談之唔落樣

2007-10-23T23:07:00.000+08:00

音樂工業已經今時不同往日，老早過了動輒幾多白金銷量的年代，以前marketing那班曱甴(某前輩的形容詞，即係無好過有的害虫，但生命力又最頑強，死極死唔去嗰隻)可以logo大細都跟你周旋半天，現在，學周星星話齋：螻蟻都尚且偷生! 曱甴都終於覺悟，知道唱片公司個logo再大，歌手封面照再close-up再靚仔靚女也未必能令銷量起死回生。換言之，唱片封套在創作上的限製已經比以往少，因為某些唱片公司覺得橫死掂死，偶然有幾招出奇制勝中到幾班怪客都未頂。於是本地流行歌手，都開始有唱片封套選擇「唔落樣」，但「唔落樣」都未必一定有好報，為唔落樣而唔落樣，等於為特別而特別，比close up大頭相更多舊魚。

以上唔落樣CD cover幾個，效果如何自己判斷。不過陳奕迅的新大碟，恕我斗膽用核突來形容，幾天前還急不及待走去唱片舖，但賣相實在醜惡，把唱片拿在手左看右看，那件莫名其妙的衫仔(為甚麼是衫仔?關《Listen to Eason Chan》啥事?)、那些不堪入目的字體。我再支持陳奕迅，也接受不了要掏百多元出來買一件甚至不能穿的衫仔，越看越火滾，最終一走了之。其實不單單只是一個唱片封套，觸目所見的東西都越來越難入眼，客戶容度大了(姑勿論是出於甚麼原因)，做創作的反倒不爭氣，這才是最令人意難平，「俾張好牌你都唔識上」大抵就是這意思。

相關文章：
-what's going on?
-唱片封套怪談

省你五十年

2007-07-12T01:40:00.000+08:00

事出突然，跑上友人N的工作室。下午茶時間，他跟我說：「有好嘢益你。」然後便登上Mr Toledano的網頁。

Phillip Toledano Photography

如何抵賴呢？咱們的「省靚招牌五十年」。

客觀的說，把百潔布和地拖頭擺滿全身，加上街道的背景，在TVC上看來，這是可行的。但當主角們跳進平面，那個造型立即突出起來，加上差不多的調調......

得啦立立令啦！

相關連結
Hope And Fear / Mr Toledano
香港廣告商會

延伸閱讀
口水創意 2 之抄考？ / 中央聖學子
康港精神巧合到暈 / 朋友
有大隻copycat隨街跳 / 畢明

鳩直男丁

2007-06-17T13:36:00.000+08:00

雄壯、巨大、飽滿、活潑、有朝氣，霓虹光管蕉牌，本該如此。

奶周抄文事件

2007-05-24T15:46:00.000+08:00

我有一百個消滅香港的理由，今日又多一個。(以下純屬私人恩怨，但實在亦反映了康港對「尊重知識產權」的意識是何其薄弱，所以在此一貼)

這是小弟寫於五月十六號，關於《標童話集2之消滅九龍》的讀後感：

「漫畫界除了甘小文以外，就要數阿德楊學德最了解「俗」的文化與真蹄。粗豪狂野的畫風和靈活運用市井對白都令人拍案叫絕。《標童話集2之消滅九龍》(到底是有心或無意?封面的「消」字多了一個橫畫!!)，個人認為比上集更精采，尤其偏愛隊道巴士系列，甜中帶苦，充滿生活感與無奈。」

原文link

下圖是零七年五月二十四日出版，第三百零五期《MILK》雜誌Book B ,page 30一個介紹漫畫的欄目，今期講小克的《偽科》與阿德的《標童》，我發現介紹《標童》的一段文字，有九十巴仙都是照抄我那篇得啖笑的《消滅九龍》：

頁尾標明：text, photo：OHbabecyncyn

不要跟我爭論排列方法不一樣便不算抄，又不是五萬字論文，短短幾句，玩重組句子肯定快過自己諗自己寫吧?! 也不會有這麼多巧合，連續幾句都一模一樣吧? 這位OHbabecyncyn(噢悲先先呀??真係唔識讀咯)，你響奶周𢭃幾錢人工一個月呀？?老闆好刻薄你咩??就算係都唔好咁cheap上blog抄人嘢吖!!! 懶就索性重組句子都慳返成段照dup再落返條link咪收工囉!! 報紙啲「網民有嘢講」都係咁之嘛!!!! 個人感想都抄，你冇自己諗法㗎?????我鬧爆你呀!!!!!!!!!!!!!

我不會就此作罷，一定會追究到底。

唱片封套怪談

2007-05-22T20:29:00.001+08:00

看見Dosss君談了點對本地唱片封套的感想，我有一些想補充。

本地唱片封套設計，其實一直都是接近styling和packaging多於設計本身，主因是唱片公司那班marketing一直覺得sell樣最緊要，又要顧形像問題，呢樣唔得果樣唔得，永遠只能在styling或graphic上攪花臣，所以我們永遠不可能得到像《平成風俗》那樣得個浴缸和樂器都做到主角、更不要題像SMAP或Franz Ferdinand那種齋字都有impact的唱片封套。

由於要顧及所謂形像問題，形像上不能玩得太盡，styling於是等同化妝set頭揀衫，最佳例子是股懼基咸魚翻生期的兩隻大碟《遊戲基》和《大雄》，兩者由碟名封面到內頁都分別大玩電玩和漫畫符號，但股生個造型...學Wyman話齋是完全無法子做到與周遭環境「佈下結界」，人景合一，不過話說回頭你又試吓叫股生扮瑪利奧或gel 王小虎頭睇下佢肯唔肯。再舉多一個例子就是最近冰島歌后的大碟《Volta》，康港歌手有誰夠薑笠入去那粒兩腳珍寶珠?王菲都唔夠膽啦!!就算有膽我都睇死班友諗唔到呢啲idea~!! 所以黃秋生幾年前的大碟《Bad taste but smell good》封套拿其他歌手的形像去惡攪，絕對是大快人心，記得當時黃在電台訪問中也質疑：點解要頭頂頂住個金魚缸？點解要揸住部中古相機/寶麗萊?點解無啦啦會有盤水兜頭兜面潑過去? 點解個packing下下要牛春咁大?點解點解點解? 就是因為styling行先，而那種styling可以完全無動機無目的純粹為「好睇」，這不是packaging是甚麼？

-黃秋生明搞事大碟《Bad taste but smell good》，我承認我是因為很喜歡這個名字所以用了來做blog名

另一個引致唱片封套不夠有趣的原因就是那班叫自己做artist的歌手。要知道外國大部份歌手都極重視唱片封套，重視程度是一開始已經會跟art director一同構思及溝通，所以像變色老妖David Bowie或Bjork這類美藝人，就算單玩styling都一樣能夠玩到變經典，真係讓半臂都拗贏你。康港的情況則是歌手甚少參予封套構思，一則他們不重視，二則根本不懂，因為甚少歌手有art sense(就連股生sell到口臭的那手漫畫都是攪笑成份居多)。不過最慘是連明哥這類算叫做有sense的美藝人，都俾人捉到隻《若水》內的鑽石人造型是抄Bjork的，你話死冇?

所以細寶麥浚龍早陣子的《Chapel of Dawn》找James Jarvis畫封面，其實算做有心改變一下沉悶的現狀(實情是他真的不能sell樣呀)，不過，那個盒和內頁layout還是劣評如潮，康港唱片要有個像樣的封套，似乎天時地利人和缺一不可。

最後同大家玩競猜遊戲：

上圖Pulp的《We love life》(2001)封套你估埋單洗了多少錢？答案是我都不知道，但我知單是那幾隻中古字體的版權費已經用了三千英磅!!(一隻字母盛惠一千，名乎其實一字千金)還未計Peter Saville的切雞費。如果在康港你跟唱片公司要求用三千英磅買幾粒字，你應該會被人捉去做研究。三千英磅我飛去外國映相唔好~?!

相關聞漿：
-Peter Saville談唱片切雞(收錄一隻字母一千英磅的前因後果)
-封套
-化繁為間
-黃耀明 v.s. Björk

非禮蜜洞

2007-05-16T21:42:00.001+08:00

難怪有膠笠公司調查指康港人性生活不美滿，因為最近的《中大學生報》風波和毛冷台《溏心風暴》的成功，都證實了康港人重財多於重色。跟自己冇親戚關係的家庭糾紛向來有本事引起大眾關心，提起家產分配問題更加多三毫子肉緊，而且不論通俗劇或真人真事，不但不愁沒有觀眾，而且必定高收視，歷久不衰。所以由恐龍年代的《季節》一直輪迴到現在的《溏心風暴》，除非康港陸沉，否則毛冷台那套recycle過十九幾萬遍的formula 絕對能夠永垂不朽，你死佢都未死。

林奕華講過：一、康港人的感情是浮誇的、膚淺的、虛假的、abusive的、容易受人影響的；二、康港人的感情是由康港娛樂圈塑造出來的。我認為說得很對，康港人道貌岸然，一方面擁抱一方面責罵。所以在康港搞咸濕嘢十居其九好心冇好報，因為太多咸濕契弟扮正氣，自己淫還夠膽戴個面具指責其他人又淫又賤。而且通俗劇看得多，還是用二十年前那種眼光看世界。當西方國家的電視台連電視廣告都能夠無遮無掩露兩點，甚至午夜時份咸片無料大放送，康港報紙卻連刊登一幅大衛像或維納斯都要在「重要部位」打格仔(其實大家覺唔覺打咗反而更咸??)，公仔箱前尊貴的觀眾有甚至辨法不投訴《Titanic》肥溫那兩點令他們「不安」???

上述兩件事，再次一證明康港地搞創作是自討苦吃，滾搞自己。因為兩者都暴露了康港人是如何保守、沉悶、膚淺、無知、鑑賞能力低、接受能力更低。康港人很俗，俗不是問題，因為俗有俗的文化和學問，可惜康港人的俗既單一又空白，毫無樂趣可言，這才是最大問題。

知 . 專 . 里程

2007-04-04T21:18:00.000+08:00

「知.專.里程高級文憑課程」官方宣傳片

相關連結：
知.專.里程高級文憑課程
香港知專設計學院
香港職業訓練局

不似內定的倉卒

2007-03-26T19:41:00.000+08:00

屎撈緊

2007-02-02T04:23:00.000+08:00

設計圖片

以屎撈緊 (slogan) 論屎撈緊，始終覺得當年「康港申辦 2006 年亞運會」失敗那句「康港一定得」powerful 些。出自同一政府，不知是否出自同一高人呢？

專業 ‧ 護衞

2007-01-21T03:35:00.000+08:00

二零零六年十二月廿七日 (周三)，不知是陰是晴，天總是曚曨的。趁假座九龍塘又一城旁 InnoCentre 的康港設計師年展還有幾天便完結，專程到訪觀摩觀摩，見識見識一下剛落成的康港創意工業重鎮。

沿着地鐵站的指示，步出達之路，從斜坡高處往下望去，簇新的 InnoCentre 就在眼前。單憑外觀，那建築語言告訴我，InnoCentre 不像太 innovative，跟印象中的康港歷史博物館、中央圖書館、科學館、房屋協會大樓等政府建築風格雷同，即刻薄的人口中的「公廁風格」。如果招牌不是「InnoCentre」，換作「食環署」，我覺得，一樣 work (仲好襯㖭！)。

進去室內觀察，大堂是堂皇的，天井滲入天然光，十分以人為本。站崗的護衞雄糾糾，制服筆挺，好不神氣，相信恐怖份子也不會輕視之。旁邊的連鎖咖啡店，洋溢着一份中產知識份子香氣，正所謂：唔打得都睇得。配套之完善是否達世界級？學子寡聞不敢莽論，但作為一個康港普通市民，InnoCentre 真的給予我五星級的氣派。如果要雞蛋裏挑骨頭，我個人對某些建築物料是頗反胃的，如：「鏡鋼升降機門＋磨沙圖案」、「楓木裝潢」、「不銹網扶手」。可能它們的存在是彰顯某種官僚品味或實惠耐用原則，但我覺反胃之餘，我覺得 visually 好唔 innovative 囉！！！

經詢問處護衞指引後，移步到地牢展覽廳。

乍見有一小桌子在展覽廳入口處，上面疊滿小冊子，估計是場刊，於是前往取之。隨手拿了一冊，正準備參觀，本來垂頭忙着的中年當席員便對我說話，以下是我們短暫的交流：

「不准觸撞展品。」(語氣機械而專業)
「哦。(知道)」(點着頭)
「但可以影相。(補充)」
「... ...」(只好禮貌地報以微笑)

知道規矩後，我便昂首闊步進入展場。誰知，聽見身後有急步趕至：「阿哥，阿哥，慢着，慢着。」回頭一看，原來是剛才的護衛阿嬏。「請問何事？」「麻煩你，一陣間，參觀過後，填一填場冊內的問卷給我。」見她這樣的專業和盡責，我那忍心拂袖而去。

康港設計師協會，三十多年來，為康港，為行業，不斷推廣設計對社會的重要性和捍衞設計業的專業品質和形象，雖然進步空間還大，但成績有目共睹。所以自己對她有一種自然而莫名的期許。自然，是因為自己家在康港兼以設計為業；莫名，是因為有時候覺得她離自己很遠，好像有着代溝似的。她做的，感覺上，好像與自己無關 (即使她名有「康港」和「設計」兩詞)。(可能她太像一個「商會」吧)

有期望和要求，亦因為她是「龍頭」、high profile、具影響力、自居專業、歷史悠久。當然明白到她仍努力付出中，人無完人，何況一個機構；但質素、嚴謹、着眼於細微處 (a sharp eye for details)，又確是專業設計者與門外看的分野呢。

知道在 InnoCentre 之前，同一個展覽在 IFC 也展出過，不知道合共展期有多久，但依我眼前展品的「摷皮程度」，真的有需要執執佢。裝裱，理應是基本事，做得不好，責無旁貸。自己人看見心酸，外人看見丟架，後輩看見失笑。(上圖下) Sandy Choi 的 typography 海報，就是如此被糟蹋了，真可惜。

展品老化，可能遇人不淑，supplier 唔生性用着九流噴膠所至，責任還可以推卸。Typographical error，則較難原諒，話晒係「Hong Kong Designers Association」(HKDA) 嘛。曾經有人講過，康港設計師 (應不單是平面設計) 有兩範差勁，一，typo (typography) 差，二，over-designed「過火設計」。學子非常同意，在這裏暫且不探究原因，事實上差 typo、過火設計遍布全港。

現任 HKDA 會長 Eddy Yu 的名牌下方有一句話：「Good design should either be unnoticeable or be able to make people pause and think.」其實，bad design 亦然，而且它可以十分 noticeable。不幸地，好幾位自己十分敬重的本地設計前輩的語錄，都有出錯。100% 相信錯不在他們，但事情反映出，原來除了專業設計師難求外，專業的 artwork artist 也難求。短短一句可以有兩處錯。Full stop 可以時有時無。

互聯網普及後，改變了我們書寫和閱讀的習慣。「Apostrophe」(’) 很多時候都被誤輸入成「prime symbol」(')，加上很多軟件只能顯示「prime symbol」，人們都漸漸把它們當作一樣，然而，它們是兩個不同的標點符號呢。要斟酌是與否，可能不是一般人要處理的問題，但若要稱自己為專業，弄清一些基本，是必要的。

文字處理中，「justify」俗稱「齊頭尾」不是不可以用，然而，不是人人曉用。不少人都偏愛「齊頭尾」，覺得一按下該設定，整段文字便「齊整」了，「美觀」了。可是，齊得不恰當，則會出現上圖之毛病 —— 穿晒窿。存放文字的 column 太窄，hyphenation settings 處理得不夠巧妙，一心想要的「齊整」變成字與字間「疏 lung lung」，醜怪無比兼妨礙閱讀。按下設定便算，不用眼睛不用腦袋去做設計，是不夠專業的行為。(縱使只為兩餐，都應該為了兩餐而認真點吧。客戶 (市場) 沒要求便不做？！)

Typography 不只是「揀揀字款」或「整靚啲字」，它是語言的視覺呈現，其重要性可想而知。當然，一句：who cares？可以完結整個對話，但在世上，確是有人 care 的 (西人多？)。

... ... ... ... ... ...

專業護衞。護衞專業。

究竟 ... ...

為了甚麼？

洋typo の悲劇

2007-01-20T17:07:00.000+08:00

簡直像發了場噩夢。

我承認我對謝小姐是比較有要求和偏心，起碼相同情況發生在胃欄胃撕身上又唔見我嘈。可能我過份執著，可能只是一份學生習作罷了。

*謝小姐你呼吸有冇困難?你左邊鼻個窿似乎俾人惡意抿平咗...!

案件重演

2006-11-16T01:40:00.000+08:00

蛇果報辦報初期，排版是以美國的USA Today為藍本，除了色彩與設計上破舊立新外(當時幾乎所有報頭都是白底紅字的舊式切雞)，亦是第一份報紙開始玩「多角度」。除了問米和走訪各類專家外，當然少不了「案件重演」。與USA Today一樣，蛇果報初期的clip art走簡約路線，風格類似飛機上那本求生指南。功能上則以圖像簡化敘事為主，敘事方法較冷靜和平和。

然而近年蛇果報的美術組似乎開始走火入魔，形式已經開始由clip art轉為連環圖，以多幅圖來敘述一件事(通常以犯罪案件為主)，clip art的像真度越來越高，人物表情越來越豐富，甚至出現爆花和風位。我想問是否有需要如此像真？當文字說明已經足夠有餘(已經夠哂煽情!!)的時候，這類連環圖是否畫蛇添足，多咗幾舊魚？

我還存有零一年九月十二日的蛇果報，當年clip art已傾向講求高像真度，但仍貫徹「一圖主義」，並不失簡約平和的敘事風格。換著今日，難保蛇果會畫一套《United 93》出來。

圖二的低炒角度實在是苦心經營......

風位同爆花落齊，會否too much?

鬼王候選人

2006-10-31T23:15:00.000+08:00

「要喺地獄成為鬼王，或佔一席位，競爭真係好大！強如我 —— 新拾蚊紙，自二零零二年七月面世以來，不停被各方強者挑戰，真係身心疲憊。趁今晚『哈囉喂』，幾唔得閒都要出嚟宣傳一下自己！」

「可能較後生嘅觀眾見慣咗九彩嘅銀紙世界，唔覺得我有幾強。但我要話俾大家知，先河係由我創嘅！唔好睇小我嘅來頭呢！就此，我專程坐時光機返到二零零二年十月，搵咗康港設計之父石漢瑞先生嚟為我拉票！」(呢度嗰幾條騎呢騷寫手，冇嚟聲望，邊夠班同牙力㗎！？)

《Garish design of new HK bank note makes life easier for forgers》— Media, 18 October 2002

I once stayed at a hotel in mid-Manhattan named Elysée. It had been awarded the sobriquet 'Easy Lay' by past guests, among them Tennessee Williams.

Perhaps he preceded me in a room with particularly garish wallpaper that might have accelerated his demise. Such tastelessness helped send off an earlier playwright. More of that later.

Our new HK$10 bank notes boast patterns and colours similar to those which the Elyée’s room burned into my retina. Their coupon-like vulgarity has already been widely disparaged; they stand apart from the existing currency like a bruised thumb.

Aesthetics are helpful in paper currency, but there are more serious issues: security and symbolism.

Among the few features to prevent counterfeiting accessible to the ordinary user is the hexagonal see-through which shows a horse when hold to the light. Its registration allows for considerable printing tolerance (aka forger friendliness) due to the spokes that overlap the various bits of the animal.

While the watermark of a Bauhinia blossom is a classic security device, the intaglio or raised printing will not be of universal value; many Hong Kong people handing bank notes wear gloves, especially in the wet markets.

Generally, the gaudy colouring and manic patterns will allow criminals to take advantage of the fact that subtlety is harder to reproduce that its opposite.

Other than a largish Chinese character for 10, on both sides, which – rather than reflecting the highest standards of calligraphy – appears to have been drawn by a Dutchman, what is of greater concern to me as a branding specialist are the absent or ambiguous references to our city.

Why a see-through horse? At first glance it reminds one of Lloyds Bank’s prancing black stallion, adding to the ambiguity. One is hardly reassured that the current zodiac animal in the lunar calendar is its reference, not the Jockey Club. Does this mean we shall have a see-through goat come next year?

Beyond these we can discern no images relating to Hong Kong, no scenes, no symbols – not even a junk. Icons reassure both residents and visitors. Currency, along with a flag and an airline or two, is a declaration of identity and a statement of aspiration. How much easier to wallpaper these new notes rather than take a visual stand reflective of Hong Kong. The lesson to bureaucrats: please don’t design.

One the new note there is a white shape around the watermark which looks suspiciously like a light bulb. Perhaps it symbolises the bright ideas of civil servants, smoothly delivered on time and within budget.

Back to the deathbed of Oscar Wilde in a shabby Left Bank hotel named L’Alsace – sobriquet unknown. Looking around the room, he said, effectively, “Either that wallpaper goes or I do.”

— Henry Steiner is the founder of Steiner & Co.

「地獄設計地獄到一個地埗可以引來罪犯垂青，做到 forger-friendly，你話嘞，夠邪惡啦啩？！」

發展過甚麼?

2006-10-29T03:42:00.000+08:00

上星期看杜琪峰接受甘國亮的訪問，談到藝發局和整個創作氣候，雖然老生常談(老早講過我們沒有新血，杜sir話齋：「啲新人硬係撻唔著火。」)，但說話出自一個局內人口中，始終有擲地有聲的感覺。說他囂張也好不可一世也好，事實就是事實，不容否認。

說來諷刺，我雖然在做切雞，但跟美藝有關的學科幾乎都只發生於六年的小學生涯。上到中學，美術根本是可有可無的一科，連美術學會都是由一群立心不良、只懂畫火柴人的契弟組成(簡直是一個預告!)，去到中三，課程甚至刪走了這個學科。藝術創作根本未被重視過，談甚麼「文化氛圍」？連個像樣的文化中心和美術館也沒有，審美眼光和鑿賞能力自小已經發育不健全，從未被開發過，攪到大家醜怪當漂亮，肉麻當有趣。

說到藝術發展，前人講來講去就是要官府灌水、資助。施政報告發出來，連演藝界阿姐都公開說四千萬太少。請容我跟杜sir口水尾，現在不是表演場地多寡、資金長短問題，問題是大家想點？官府有沒有一個長遠計劃去發展本地創作？不要亂講甚麼「香港流行文化產業在區內一直佔領先地位」的廢話，領先地位不是自己話係就係，領先甚麼？領先醜?領先抄襲?領先乏味？簡直笑死狗。不敢講藝發局有份俾錢的全是劣貨，但大家有眼睇，根本乜都得，全無標準可言。說政府孤寒？喂闊佬也不見得攪到好東西出來呀。所以不要說四千萬少，四千蚊我都嫌多，反正一直對錯症落錯藥，何況患病的先天性營養不良，再多時間金錢都是費時失事。

正如杜sir在訪問開首所講，個人力量與信念非常重要。尤其在如此環境下，更加相信這句說話的價值。

相關資料：
屍政報告
偽發局

新不如舊

2006-10-27T01:59:00.000+08:00

這是大約一九八五年開始出版的新版衛斯理系列。封面乾淨利落、簡單但有神秘感，個人感覺是現在再看也不覺過時。

這是明窗二十周年的紀念版。請告訴我這只不過是腦環同或軟硬體的學生習作(而且是劣等生):

這彷彿是衛斯理其中一個故事的老土寓言：科技不斷進步，人腦不斷退化。

國切連的Human Error 事件

2006-09-10T01:35:00.000+08:00

2002年，我朋友K先生跟當時是同事兼好友的L先生(a.k.a computerhead)於Motclub903(發源地)的支持下，製作了一盒二十張的Postcard，以紀念品形式供Motclub會員以網上積分換領。整個pack是一個極簡單的pizza盒：

postcard set 正面

postcard set 背面

然後，數日前有友人報料，指於HMV發現idN(全名International Designers Network, 國際切雞絲連網，簡稱國切連)發行的DesignEdge2005 dvd，上有疑似是K先生(a.k.a rexair)跟L先生(a.k.a computerhead)的logo。朋友調查之下發現真有其事，兩位立即對事件表示震驚，一則K先生跟L先生均完全未曾參與任何DesignEdge2005之活動，二則碟面graphic完全是把當年的postcard set 背面原封不動照scan，有圖為證:

朋友於是去電郵往國切連，希望了解清楚事情的來龍去脈。信中表示對logo被擺上不屬於是自己設計的物件完全不知情，並且對此感到不快，希望國切連能夠有一個合理答覆，否則不排除會採取法律行動。朋友於當晚立即收到國切連方面的回覆，現一字不漏照錄如下(除人名/地名/某產品名稱一律「打格」)：

Hi XXX & XXX,

My name is XXX from IdN. We might have met some years ago when XXX introduced us.

I am writing in regards to the rexair/computerhead logo appearing in the DE05 DVD. We apologizes for this apparent mistake on our side. Truth of the matter is that we were scanning the 903 postcard souvenir cardboard box to produce the background texture for our DVD.

Human error to control the visible layers occurred during output. It was not intended that the design had incorporated the rexair/computerhead logo. Not to our defense, the fault was purely due human error and we sincerely apologizes for this incident.

On a lighter tone; IdN is currently working with XXX on their 2007 worldwide campaign. The campaign is about "XXX XXX XXX", and it involves commissioning 1 artist from selected Asian cities to produce an art piece to tour in XX , XXX and XXX. HK being one of the selected city, we would love to see if there is the possibility to collaborate in this front.

Please let us know your thoughts in both issues.

Again, please accept our sincere apology re the rexair/computerhead logo. Love to contact you at a time convenient to explain the situation personally.

All best, XXX

XXX / IdN Magazine
Shop C, 5-9 Gresson Street,
WanChai, Hong Kong
HONG KONG

朋友與computerhead均未能對回覆表示滿意，因為：
1. 國切連方面似乎認為字面上的誠心道歉已經足夠，並不打算採取更實際有力的行動去彌補錯誤。
2.道理上說不通，大家都是從事切雞，熟悉創作與製作過程，出現這種錯誤的機會率幾乎是0%，而且找一塊空紙皮又有何難？國切連總部樓下就是生果檔。
3.尾段最令人氣憤：明顯想用「好玩嘢」利誘，意圖平息事件。這類手段於切雞不是請客吃飯一文已有提及。

朋友於是再去信，表示這類錯誤實在不能接受，現下唯一解決方法是國切連方面回收所有dvd，因為上面印有rexair與computerhead兩個切雞單位的logo，實在令人產生混亂。國切連於一天後回覆，表示同意回收所有問題dvd，並即日開始行動，現在idnproshop.com已經不能網上訂購該產品。

事情表面上似乎得到解決，但朋友認為事情有幾點令人不能接受，故希望在這裡作個記錄，引以為鑑：

1.國切連作為一間成立超過十年，並且於行內有一定名望的出版社/創作單位，這類錯誤基本上沒可能會犯。就算於執行上出錯，製成品出街前難道會無人驗貨或approve? 國切連明顯隻眼開隻眼閉以為無事。
2. 國切連方面其實毫無誠意，原只打算作口頭道歉和「好玩job」的利誘便了事。要經K先生和L先生方面提出方肯答應回收問題dvd。
3.國切連此舉毫不尊重切雞絲。

希望事件就此平息。

Decision Making 之郵票

2006-09-09T14:11:00.000+08:00

據知，康港郵票設計係以政府慣常用的「外判投標」方式來決定委派誰做來設計的，除「設計質素」(如果有的話) 外，「價低者得」則屬常見 (我們政府多廉潔！)。可能少數「名家系列」，如「麥嘜系列」，會以「邀請」方式請特定人選來做。但一般情況下，都在「低成本」的框架下製成。

當然，低成本不等於差設計。有幸參與一個政府的郵票設計 (雖未如設計抄票般巴閉)，的確可以為個人或公司的 CV 生色不少 (如果設計得似樣的話)。可是，長期在如此的「設計不平等條約」下，有幾多好設計可以「低成本又高質素」，可以「唔係堆砌式 computer graphic」，可以「唔係下下 cutie 公仔加醜 typo」呢？相信郵政局的 portfolio 已說明一切了。(奇怪，前電腦時代的設計比現在的好。)

大英帝國的郵票設計世界知名，人見人愛，睇見都想儲。唔知人哋又係咪行「投標制」嘅呢？如果唔係，咁，呢個「港英地雷」，真係大囉！

我們的出路

2006-08-16T08:47:00.000+08:00

以下為今年各大設計院校有關課程之招生廣告。

大一藝術設計學院

香港傳藝中心

香港專業進修學校

香港設計學院

香港正形設計學校

只是沒有發現香港理工大學和香港專業教育學院，大概她們都不愁沒有學生報讀罷。

不欲多加思索，就此作結。

請不要給我膠袋

2006-07-06T01:57:00.000+08:00

夏天一年比一年熱，連最遲純的地球人都應該知出事了吧?

綠色學生聯會幾個月前攪過一次無膠袋日，似乎見外間有反應於是添食，由666凶兆日開始，決定把每月首個星期二定為無膠袋日，各大小超市便利店都力撐，在這個錢銀至上的社會有商人肯為環保出分力，算感人。

感人歸感人，我的感想是老早便應該攪，而且起步已經比人遲，要攪便不妨大刀闊斧些少，毋需要挑個如此難記的日子，大部份人(包括我)連今天是星期幾都未必攪得清楚，何況是-每-月-的-首-個-星-期-二-呢? 倒不如以每星期做單位，更易入腦；而且，為甚麼要是星期二？為甚麼不揀最多人shopping的周末周日開刀？昨日行街買嘢，便有很多人未知發生乜事，在排隊往收銀處的人龍中不斷聽見類似「吓??哦...」的對白，據估計還會繼續發生於-每-月-的-首-個-星-期-二。

但五毫子一個膠袋大家還是心甘命抵繼續俾，結果可能是樂施會以後會多了一筆善款，但膠袋用量未必會減少。港人的環保意識還是十分薄弱，這條環保路如果繼續這樣一小步一小步走的話，分分鐘走到明日世界終結時都未走完......

「每月首星期二」到底有幾累贅有幾戇居，睇睇官方宣傳海報就知：索性list哂「每月首星期二」出嚟~!!!將件事再複雜化~!!! 仲要玩漸變，唔知想點。個Design超肉酸，學生聯會學生手作仔都係咁話，完全係浪費用紙。

見Jill出蕉

2006-06-02T01:52:00.000+08:00

當一眾補習大帝皇太后都力求完美，非要把自己的宣傳品變成電影、唱片和演唱會海報不可時，Jill姑娘竟然反其道而行。

凌亂中見整齊，乾淨裡見繽紛，文案簡潔而有力，大家豈能忍手而不繼續"Hit Me"?

歌手大碟銷量強差人意不是罪過，打蛇隨棍上這招也未嘗不可，但要玩為何又不去盡，用真的雜誌封面還不是更有說服力？若是怕為雜誌賣了廣告或是版權甚麼的，打格close up迫爆怎樣也好，總有方法解決，就算要扮亦懇請放認真點，現在得了個用Word排出來的街坊福利會環島一日遊。

真跡連Logo都「起晒格」，彷彿在告訴我們，最有創意的大中小學生，都開始了漫長的暑假。

人肉羮

2006-05-23T23:30:00.000+08:00

想講好耐，康港駕駛學院個新撈稿，十足搵瓷羹畢人肉食咁，好唔文明囉。

媚外行動

2006-05-21T21:37:00.000+08:00

本埠地產廣告，素喜提供假像，或法國南部歸園田居氣息、或小甜甜時代背景騎馬射雀貴族風、或中產時尚大都會感覺，努力露造一種高價貨氣氛，而且例牌愛以洋人做主角，重覆上世紀八十年代港片那種洋人住洋樓養番狗的可笑謬誤(是因為殖民地的問題嗎?)，矮化自己之餘亦矮化別人 — 別以為洋人會受這套，跟一個留港多年的英國客人談過，他們一樣覺得這類偽貴氣的廣告可笑白痴，甚至一樣覺得侮辱。以為洋人個個有錢、以為洋人個個貴氣、以為洋人個個氣派、以為外國月亮特別圓，香港人在這種觀念問題上好像從沒進步過......

賣樓就賣樓，甚麼延續經典？甚麼稀世傳奇？九唔搭八，以為拍賣古文物

Consistency 之 naming

2006-05-20T18:56:00.000+08:00

大尾督、大尾篤、大美督、大美篤、大鎂督、大鎂篤、大娓督、大娓篤 ... ...

(先唔講嗰兩個尊貴嘅政府部門撈稿同各種 graphic element 嘅質素。和諧、統一、夾，真係咁難？)

啡鋁罐 ‧ 藍膠樽 ‧ 黃廢紙 ... ... ？！

2006-05-18T02:40:00.000+08:00

VO：可能係世界上最令人 confuse 嘅環保分類垃圾桶。

紫外妹妹話你知

2006-05-13T16:12:00.000+08:00

「我叫紫外妹妹，又名阿紫，現在跟大家打個照面~」

由06年5月11日起，香港天文台會於每日下午五時後提供翌日的最高紫外線預測，並於天氣家族中加入「紫外妹妹」這個新角色。

天文台指出，紫外線指數預測系統並非外國引入，而是由港人親自開發，整個系統的設計過程由零開始，是繼泰國之後，東南亞第二個推出預測紫外線指數的地方。

由此可見，港人創作力無限，但看來都是遍重實用為主。

Typography 之少女推藝術

2006-05-13T07:30:00.000+08:00

VO：可能係世界上最 cutie 嘅藝術推廣辦事處。

門西

2006-05-11T11:22:00.000+08:00

毛線啲尺度有時都幾寬鬆，而且成班男人打大赤肋圍住個女性生殖器都幾激。聞說呢個其實係個「閻」字，真係好鬼地獄...
順帶一插，嗰啲成日失驚無神飛出嚟嘅「乜乜差差特約」其實好鬼騷擾，明明古裝戲彈句「以唇服裝特約」出嚟，想點??

吹賬

2006-05-10T20:05:00.000+08:00

"扒王之王"之餐桌紙上發現此"懶好笑"的Service. 我諗劉德華都會覺得佢地將服務態度呢家野玩得過左火...

Typography 之每人都有一段醜 typo

2006-05-08T21:51:00.000+08:00

入境處設計組同胞：「阿蛇，呢幾行字究意點排列先夠強政厲治呢？」
阿蛇指着電腦螢幕：「嗱，咁咁咁 ... 咁咁咁 ... 咁咁咁吖嘛！死蠢！冇嚟 art sense！」

除套前

除套後

PROMOTION

2006-05-05T12:41:00.000+08:00

琴日行經銅鑼灣, 正當等人百無聊賴之際, 望到路中心有數個年青人, 佢地附近正有途人註足拍攝. 遇上這種情況我通常會急步行過再中途睇下有乜咁勁, 唔睇由自可, 一睇........呢隊人原來正在為"禍兄帛化游"做緊鋪毛, 每人手上都揸住D"禾兄帛化游"產品, 包括D油, 更有禾兄旗下的蝠仔毛公仔; 佢地的酸傳動作就係自動自覺每十秒左右自選一個pose, 甚至調位. 當中不乏一D cutie, 呂奇pose. 我迅間只係瞄左一眼心入面已勁出現左數十次"做乜X?"

最後我行過佢地身邊兩次都無影相, 個心都係諗緊"做乜X?"; 由於無習慣影相, 到醒覺地獄曾經係我面前出現, 已經太遲. 回家於是上網睇下有冇reference, 上禾兄帛化游個西睇下, 個心都係諗緊"做乜X?".......極力推介顏生的BGM, 真係"多得你~~~~~~~~", 去唱K都有得揀! click 入去更有蝠仔系列, 但係唔知點解會變左"時尚時裝系列......乜帛化游有出衫咩????

禾兄帛化游:
http://www.whiteflower.com/

廣告:
http://youtube.com/watch?v=pLWp34iMmyQ&search=白花油

禍兄帛化游廣告更有顏生同對手戥耗肛同佢打"羽毛油"; 亦曾經在名豬台看見英文版廣告; 希望大家可已唱番俾我聽係點唱, 因為入面D音真係好難揣摩.

軟得快硬得慢

2006-05-03T00:38:00.000+08:00

八達通呢劑都算核突，人哋麥噹噹農曆新年先搵軟硬同大家拜年；你八達通冇budget就算，都唔好搵嗰兩隻已經俾世人遺忙嘅快慢必吖!! Styling又核突(分分鐘都係兩位仁兄嘅鬼主意)、又冇橋、費時失事，齋字稿都冇咁嬲。而且仲躉成疊leaflet響麥噹噹啲收銀處派，真係司馬昭之心，盲人皆知。

Typography 之 Leading

2006-04-29T07:46:00.000+08:00

諗到頭都爆，都諗唔明點解「觀塘」同「Hong Kong」點解「咁親密」。唔通阿大咪、大傻、黃光亮、志雄哥佢哋喺入面悶悶地玩 typo？

舞出色

2006-04-29T01:46:00.000+08:00

我屋企樓下間新肛酒樓夜總會嘅poster，仲恆過油尖旺啲盆菜逼爆咸濕poster。Photoshop啲Filter/effect用到盡(Adobe可以考慮借嚟當教材，各大小切雞院教則可用作反面教材)，啲element件件都自有天地，點止舞出色，直頭爆過哂所有彩虹色~!!!!!

我想咁.

2006-04-29T00:55:00.000+08:00

呢度有D靜. 我決定每個禮拜都Post一張"HongKong多創意"相上o黎沖起o下, 大家點睇? O唔OK?

週潤髮 - 每星期做一次焗油

2006-04-21T17:58:00.000+08:00

睇完《化繁為簡》一文後, 我不禁翻看我在近幾年間不斷收集的《香港食字圖片庫》. 找到這一張經典. 佢成功地將香港 "食字文化" 和 "間字文化" 融合, 有形體有意境. 成為我心中的經典.

化繁為簡

2006-04-02T14:57:00.000+08:00

香港人最喜一窩瘋，所以當「間字」再度重現切雞界時，人人逢字必間，無間不歡，係咪都間一餐先至安樂，雖然大部份情況下「間字」總好過用罐頭字，但問題在於大家已經開始不考慮是否真的有此必要，甚至經常出現「唔睇題目」的情況，例如當一單job萬事皆欠奉只得個title的話，便經常會收到「你間住隻字先」的指令，以致最後出現字撞圖、圖撞名、名又撞返隻字的抄車情況；又或者沒有做足research，對一個form的結構未消化得足夠就落手做，於是隻字總是三尖八角，頭大身細，畸形發育。

近年最叫人眼前一亮的「間字」：深圳城市\建築雙年展(designed by 廣煜)。夠簡單夠大膽夠殺，idea雖然係二手，但內地居然有空間俾佢出我即刻冇野好講；香港？半秒內肯定被客K.O

「間字」好像已經成為903 graphic的簽名式，但略嫌欠新意思，而且遇然會出現每隻字長短不一的情況

我嫌棄大部份現成的中文字款，所以也算是事無大小都要間一餐才安樂的一群，但遇著筆劃太複雜的字，有時都會頭痕，因為心目中那套字已經有個form，如果不幸地當中有一兩個字筆劃太多的話，那個form便未必適用 — 假設要用「春光乍洩」那個form一劃不漏地間一句「鑿龜鑿龍鑿麒麟」，那將會是一個令切雞屍崩潰的大災難；換言之當切雞屍撞正這種密不透風中文字的時候，為求美觀，無論如何都要作一定程度的偷工減料，搬走幾劃減咁幾撇，化繁為簡；其實有時候我不介意個別幾隻字用大家見慣見熟的簡體字，因為有好些簡體字賣相其實都不醜(例如體育個「体」字、漫畫個「画」字，是受童年動漫《六神合体》和《玉郎漫画》耳濡目染的後果)，奈何大部份copy writer都表示不能接受，一則當然是覺得繁簡間竹效果不論不類、二則覺得個切雞一有簡體會就發出陣陣娘味，有些更嚴格的甚至要求筆劃要正確，剔或勾尚且睜一眼閉一眼，其餘橫劃棟撇則一律要好好保存，否則大有被人取連字都唔識寫的危機。

另一經典「間字」— 美都餐室，除了「都」字保持原狀，其餘都經過一定程度的簡化

當然，以上所講那種為求美觀而改動的「間字」既非正體，亦非簡體，而係形態上比較接近潦草字的一種非正式字體，只求大約有個外型令人「望形生字」而已，每個人的寫法都可以不相同，並沒有特定的一個官方寫法。但當去到洋洋灑灑幾千幾萬字的內文時，則想「間」想「潦」都無從入手，英文字只有廿六個字母(分埋大細楷都係五十二個)，所以比教容易造一套稱心的字款(而且選擇比中文字多出數百倍)，我早前提過的荷蘭朋友就很喜歡每單job都tailor made一套字款；但中文字坐底五千字，陣容龐大，除非擁有大量青春或對間字有變態的狂熱，否則罐頭字款似乎是唯一的選擇，問題是現有中文字款有細分粗、中、幼三級的少之又少，幾乎只有黑體和宋體兩大家族，粗壯如綜藝或板黑只能用作大題，完全沒有為內文而設的瘦身版本，非常可悲；老實說，有時候我會怪繁體字實在太多筆劃太累贅，沒有簡體字那般清清爽爽，所以日文配日文漢字好看，因為經簡化的漢字還夾雜更簡單的日文字，就算不識字當一堆形狀看都有種清爽氣息。

令人絕望的罐頭字款，"香腸體"?!熱狗檔或成人玩具店都唔會想用

所以話，貪靚，係好麻煩的。但作為一個純粹尋找閱讀樂趣的讀者，我還是比較寧願看正體字，始終是從小認識的文字，所以讀得較快較順亦更有感覺；相反簡體雖然也懂得讀，但就比較疏和生，感覺總是不太舒服，像余華的近作《兄弟》，尚書房明明有平靚正簡體版（連封面都勝過繁體版呢~!)，我直到現在還在繁體和簡體之中掙扎，問題當然在於價錢的差距，要閱讀陪伴自己成長的文字，就要付出較高的代價(當然，係比較問題，並非正體賣得貴，而係簡體賣得平)，但若然以後只得簡體版的話，我不會因為有得買平書而感激誰，相反其實都幾無謂，大家有閒暇去xanga之類的小朋友(或億萬少年或我要做model，總之大量腦筍未生埋的奇人)日記網打個轉就明 — 當大家連打/寫正體字都有大量錯別字的時候，如何能要求他/她們再認識另一種新的文字呢？當看見《有線娛樂新聞台》內的一眾港星講五音不全甩皮甩骨普通話的時候，阿公是否應該要求大家要講得正國語先至為之首要呢？

錢行

2006-03-29T12:08:00.000+08:00

某康港大錢行。係都迫我用上面那組字，因為跟返上幾年喎。咁大間錢行，的人都唔用腦。

無限on Q

2006-03-12T11:49:00.000+08:00

我在古早的時候，曾經有病呻吟我們這個行業問題多多，而其中一個大問題就是切雞屍從來未被當成是一門專業。醫生開藥，無人會過問成份，冇人會問你開乜野藥俾我呀大夫？(柏楊在《中國人，活得好沒有尊嚴》一書亦曾提及這種現像) 去眼鏡舖驗視力，無人會質疑那份數據的可信性。唯獨做切雞，份print out都未乾已經被客人插到體無完膚，試圖一齊「討論」，對方就算詞窮到谷底都還有一記殺手澗：「靚唔靚o既野好主觀o既!」,說時滿面得色，完全不明白自己的無知。既然要用自己那套準則去評審的話何不自己落手落腳做更省時間？我供埋你去讀腦環同又點話？反正在他們眼中都是擺圖砌字的作業已而。

有人以「無限Q」作生意手法，問題不在於頂唔頂爛市，要鬥平的話，早晚會有比他更平的傻仔。「無限Q」反映的問題，是有人願意更進一步淪為客戶手上的一隻滑鼠 — —錢我就係收咁少架勒，但一定服待到你舒舒服服，大家一場賓主無謂拗頸，你鐘意點改咪點改~~係o既係o既。當然，人家如何做生意是他家的問題，尊嚴與否，干我屁事？但問題是當這個行業本身已經毛病多多的時候，為何還要在傷口灑鹽呢？無心教育大眾，都唔好帶壞d細路呀！七千大元請個fresh grat 做人隻mouse日日砌無腦稿，何苦來哉？當教育都已經做得不好時，為何還要對班新仔搏命落毒？我相信當大家的水平繼續地向下墮時，所帶來的影響絕對不只限於這種個別的「咭片皇功能組別」，而會是全面性的；當壞品味都能夠人傳人的時候，我們有好大機會連懂得講「靚唔靚o既野好主觀o既!」這句話的顧客都無緣再見 — 仲邊駛拗?話事果位係佢地，唔係你呀~!

昨日去了sandy choi 的一個小型超迷你conference，雖然未至於滿載而歸，但多少堅定了我的一些想法，下回再續。

三個要點

2006-03-09T22:14:00.000+08:00

一間設計公司以平價package接job，引來不少意見。

我，有些想法。

一：設計公司沒有責任教育大眾
任何生意，最大目的只是賺取利潤。沒有利潤的生意，什麼都談不上。在合法的情況下，我們不應禁止一間公司如何運作。一間公司除賺錢外，假若能對社會有extra的意義（如教育大眾），是值得鼓勵，但非必要。沒有，我們亦不能怪責他們。

二：因果倒掉
我們常以為，一些賤價設計公司的出現，會敗壞香港設計行業，敗壞客人品味。那是倒果為因。其實，「賤價設計公司的出現」不是「敗壞香港設計行業」的原因。相反，「香港設計行業的敗壞」才是「賤價設計公司出現」的原因。我們以為只要消滅那些賤價設計公司就能打救設計行，實情事否如此？

舉一例。早前設立的副學士，就是收容那些不能升大學的學生。政府見到大批不能升學的學生，便想辦法將它消滅，而副學士計劃好正令他們又合理化地變回學生。問題解決了嗎？當然不是。今日新聞又賣副學士問題爆煲。當日出現大批不能升大學的學生，只是社會問題的結果。原因可能是我們的教育制度出了問題呀！但，決解結果當然容易，頭痛醫頭，亦最合一些喊口號的熱血青年。

三：根本問題
一，是香港社會質素。
二，設計教育沒有做好把關工作。
太多學校？太易畢業？當老師都要考基準試時，我們同行又否想深一層呢？我們在屌那些賤價公司時，又是否將問題太過簡化？

Free Pitching

2006-03-08T16:25:00.000+08:00

HK Design Community呀，我估裡面好多人都反對Free Pitching。

我想，只有在Free Pitching環境中沒有利益/優勢的人才反對Free Pitching。那些人，常常大大聲話要齊齊不做Free Pitching，你想，世事如此簡單嗎？不能Free Pitching，我想香港有不少公司會反對。

世界並不如那些熱血青年中年想得那完美。大家都知道不少design house並非單以設計作賣點，可能是價錢、關係、形象等等，都是各公司的賣點。要硬性規定別人以任何唯一標準作賣點，那是否公平？

反對Free Pitching的人常以為為人請命，我敢打睹，根本大部份公司都反對他們，反對不準Free Pitching。

我懶，不想打長文，希望大家能理解那想法。

假如他們覺得Free Pitching不當，那何不組一個「不作Free Pitching會」，志同道合的人，齊齊不Free Pitching？

《切雞不是請客食飯》讀後聯想

2006-03-04T10:27:00.000+08:00

我知道不少客都會以「有得玩」視為報酬。為什麼會這樣？我幫你做job，你給我錢，那不是已是報酬嗎？當然，客在$上再加任何extra的報酬，無任歡迎。但嘛，只有中三經濟程度的我，都知依個世點會死錯人？有著數？唔係化？十成十，「有得玩」後，實則報酬就少些囉。以上情況，大家行家撈過幾年都好明白，唔需多講。但呢，我想寫的是，除了客人，有時連大家自己人行家都如此。有人曾在某名牌graphic house做，當然要狂OT唔駛講。我問，何苦呢？他說，在那名牌graphic house可以做到些「好野」喎。我屌！

這是香港切雞人最根本的思維錯誤。

幾時變得將做到「好野」等同於OT呢？那只是老闆們一種rip off的藉口呀傻西！可憐是，大家都信相這套想法。唉，可憐香港切雞人呀~~~可憐呀~~~

有人曾寫文革之後，很多人因為信念一夜破產，有人更一夜白髮（請認識歷史的朋友指正）。可憐香港切雞人，回頭已是百年身哦。

女人之苦

2006-03-04T10:23:00.000+08:00

明晒！

切雞不是請客食飯

2006-03-03T17:48:00.000+08:00

「天職」，聽落係一樣好偉大嘅責任/使命，偉大程度等同「幫阿公做嘢」，阿公係邊位？其實不必深究；可以係陳惠敏、可以係康熙、甚至可以係master yoda成日提住嘅"The Force"，總而言之去到某時某地，總會有一個位置，有一個你需要負嘅責任，個責任可能好巨大，遠遠超出你能力範圍之外；亦可能輕而易舉，兩三下手勢攪掂；學Peter Parker個阿叔話齋(講完就瓜左)：「能力越大，責任越大」，未必一定係下下為人民服務，但一定係「必定盡心盡力，妥善辦妥」，否則會唔會五雷轟頂我唔知，但肯定係阻住個地球轉，影響原力平衝。

咁切雞屍呢啲咁卑微嘅螻蟻又有冇所謂「天職」？我可以即刻答你/妳：有！而且好簡單：懶偉大的講法係美化環境，謙虛啲講就只不過係做靚啲野。反正點都有個意義響處，投向dark side為搵餐晏仔生產垃圾愚昧大眾，一樣有本事影響生態，降低人類智能與品味。問題係呢種所謂「切雞屍的天職」，好似已經俾大部份人遺忘，甚至已經慢慢由「天經地義」轉化為一種交易籌碼。

家下接Job，價錢已經慣性地低，偶然會有「好心人」走埋黎：「你都明㗎啦(我唔明)，錢就真係唔多㗎啦(例牌伴以乾笑幾聲)，不過就有得玩囉。」首先容我解畫，「有得玩」，響呢處廣義係指「有得俾你發揮」，但更多時候其意思其實係表示「有得俾你做靚啲」(當然我講緊真係有能力「做靚啲」嘅切雞屍，本埠實在太多讀完個腦環同電腦course就當自己係切雞屍的人渣)。換言之，呢個世界原來好多悶job，好多悶客要埋哂啲悶嘢，自問自己都做過唔少呢類job*，日子有功，覺得做悶job已經係一種慣性，一種default狀態，意志一而再再而三被磨滅。於是「有得玩」變成一種利誘，甚至好似一種恩賜，根本已經忘記做得好係應份，幫人做野要收錢亦係應份。為履行自己最基本嘅責任而俾人壓價；人地出碟鼓油我出雞，仲要出埋薑蔥兼燒紅埋鑊自己煮埋上埋碟(仲要送埋甜品/飯後果添呀陰公!)，呢個甚麼世界？甚麼道理？最大鑊係，懶有骨氣唔接咩？大把傻仔爭住做，仲要平你一半!!以為敲你門嗰個「好心人」賤，原來大把願打願捱被虐狂!!

最近我更加發現情況越趨激烈 — 「有得玩」已經變成最值錢籌碼，「錢銀」已經不作相討及考慮之列。於是大量fresh grat或悶job切雞屍往往成為呢類「無良好心人」嘅欺騙對像：「嗱！錢我地就真係冇架啦，不過~~有得玩喎~~」，於是份份job都係天空地嘅苦悶切雞屍一聽到「有得玩」二話不說立即落搭，而剛岩讀完切雞嘅小朋友見有機會大顯身手，亦決定慷慨就義。更嚴重嘅問題係就算作品件件皆精，都未必一定乎合要求或企業/品牌形像，但「無良好心人」礙於自己衰貪小便宜，切雞唔俾錢，所以一般都唔敢要求多多；加上大部份都只求有個切雞，不計較質素，於是形成「切雞屍越窮，切雞亦越肉酸」嘅景況。

其實以上種種，都令我諗起中學中文科王力果篇《請客》，大家都抱住一種「小往大來」心態，「你唔收錢/收少啲，我俾你玩」已經成為一種虛偽嘅公關手段：「原來大多數人的請客不是目的，而是手段；不是慷慨，而是權謀！」(王力好激動!!!!!!)
已經default被認為「老馮要O.T/老馮唔駛瞓」，家下甚至發展到「老馮唔駛錢/老馮唔駛食飯，切雞屍個個係神仙!!」，本埠切雞業，似乎越黎越朝崎形方向發展......

伸長閱讀：《請客》課文一覽

*大量"大企業"job，但全部個brief都係一樣：「我地要表現dynamic! harmony! 有朝氣! 年青! 上進! 陽光!」，而所有嘢加埋一齊原來=維港/青天白日!!

男人

2006-03-03T16:07:00.000+08:00

要知香港最難頂的男人樣版，相信看看他們就得。那陣味，快些聞下啦好。一看他們，就知以為自己好有型。正一讀書讀壞腦。當然，更值得寫是他們的廣告呀，用字呀等等。但懶人如我，當然是午睡好過。

Where arts meet and flourish ?!

2006-02-19T07:03:00.000+08:00

「Where arts meet and flourish」，「文化藝術大都會」。康港大會堂官方網頁。唔講嘞。請大家自己欣賞。

同場加送康港文化中心全年會員申請大優惠！贈送精美「修甲套裝禮盒」。優惠期有限，千祈咪錯過。

是日見紅

2006-01-13T23:56:00.000+08:00

食有食相睡有睡相，到內地打個轉的話，亦會發現好多食店嘅「招牌」都有個相：紅色假emboss假shadow毛筆字踩一個天空地，由〈王阿瑪新疆小吃〉到〈老趙包子店〉(國內硬係唔知點解好多叫老趙嘅食店,姓趙特別識食?)諸如此類，吃既野唔同但個個招牌倒模一樣。最近似乎連咱們康江都有呢個趨向，核突係核突，但當然唔能夠要求上水某糖水阿姐或新填地街某某小食店重金禮聘搵大師雕個金漆招牌鎮住個場，人家小本經營，有咁o既閒錢開多間分店唔好?! 但若然係大機構大組織的話，呢啲錢就真係唔省得，所以今日首趟去尖東站就俾我見到衰野，份外眼紅 — 爆血管個紅呀!

假假地叫狗講鐵路，居然都容許呢啲野出現，十足Dipolma 1st year啲 work，懶dynamic字(拿拿拿!!又係發發聲毛筆字呀!!呢隻仲要係偽毛筆字!)+漸變扮金屬字+又假又硬無意義shadow，成個相正正就係果隻國內食店banner style(唯一分別係咱們仲少了一片天...)。所謂耳濡目染，普羅大眾日日經過見到呢一大堆壞鬼切雞，漸漸就會演變做自己品味嘅一部份，肉麻當有趣，老套當時髦，不知不覺慢性中毒，領左野都唔知。

火車地鐵呢d流量咁高o既地方，日日人來人往，三教九流五湖四海乜範數都有，咁多對眼睇住，咁就真係唔該d signage做好少少啦!! 即係咁，一套好嘅signage除左好睇同實用性，重要考慮埋點樣educate大眾，因為成套system本身根本係一套國際語言，個個望圖生義，所以當中其實要有溝通技巧，唔係畫靚果d男廁女廁公仔就收得工*，從呢樣野大家應該明點解成日話good design可以educate大眾甚至提昇大家嘅水平，你以為Jonathan Ive心口多左個勳章只係因為iMac同iPod外型夠「潮」麼？可惜康港暫時未搵到一套似樣嘅 Signage System，大如赤鱲角機場都不合格，仲叫自己做國際大都會，醜!!

貨真價實立體金屬字，堅過石堅，可惜買少見少，漸漸被「國內食店banner style」取代，圖中呢間強記亦已經不幸對摺，咱們康港又少個「鐵漢」...

*當年去敦倫某間bar，男廁公仔係正常見開棟篤企，女廁都係同一個公仔，不過係坐低左~~

現袋教育

2005-10-14T02:41:00.000+08:00

今日途經巴士站，赫然見到一揪肉騰騰嘅龐然大物！我當堂嚇一跳，然後得啖笑：

真係內心交戰，魔鬼天使同時出現；第一個反應係：咱們康港都終於「解禁」了、有進步了、長進了！總算有色膽包天嘅業內人士夠薑sell呢啲Idea然後又居然有思想開通嘅客開得起呢類有味玩笑了！第二個反應當然係：真唔真呀？咁 hardcore都出到街??!!打死都唔信!!

有一類print adv，單睇image可能平平無奇，唔知佢甚麼春葫蘆賣甚麼春藥，但當配合埋句tagline一齊出招嘅時候，就會產生無窮威力，成件事不但明朗化起來，好多時仲有本事笑死你；以今次事件為例，連埋句tagline一齊思考，又會產生出多一串聯想：到底老李係邊個？老李老李，年紀應該唔細，唔通用成人紙尿片？講到尾...呢揪野到底係咪同「下一袋」有關？如果答案係肯定的話，咁老李係咪即係俾自己啲尿尿"up"到乾爭爭紅腫腫？如果答案係否定的話，咁...呢揪野...到底係啥玩意？視線再向下移，原來仲有一句caption：「舒緩因失禁而引致的皮膚不適，潔膚、護膚，同時護理！」
不過睇完就更加唔明白，於是響巴士站對住呢揪龐然大物，內心衝滿住衝擊，滿腦子問號，成個人從未如此迷惘過，所以呢單野真係清官難審，唔上唔落，不知點算好，不過無論如何，能夠引人暇想，提供到一定嘅娛樂性，點都係一種功德嚟嘅......

循環創意之軟硬聯盟

2005-10-11T01:20:00.000+08:00

"The secret to creativity is knowing how to hide your sources."
Albert Einstein

Released on 24 April 2005

Released on 23 September 2005

天國與地獄

2005-10-08T02:06:00.000+08:00

如果真有所謂「一念天堂一念地獄」，那麼這兩個虛擬空間出現的條件根本就是"depends"，用一句最廢的廢話形容即是「見仁見智」，我三頭兩日在自己竇口對人對事評頭品足，指指點點，可能真有人會認為「唔係丫，我不嬲都覺得官府d撈稿幾靚幾creative喎」、「康港d情歌夠冧，慘歌夠慘，我當藥食架喎」、「毛線電視d節目我成家人晚晚追集集錄，有乜問題?」。

冇!絕對冇問題的，官府撈稿自有它的一套風格、慘情歌自有它獨有的情緒、毛線電視自有它趣怪的表現方法，這些統統都是康港特色，特區獨有的產物，亦正因如此，更應多多發掘，唔理好醜，最緊要有睇頭，但也希望能在探索和發掘的過程當中，能夠為「何謂康港風格？」理出一個頭緒來，地獄生活雖然熊熊烈火、受盡折磨，但自有它的風景；天堂雖然陽光普照、乾淨企理，但也不一定是精采好玩的(當然...講係咁講，其實最緊要好玩，否則都落硬地獄...)。

有破壞冇建設

2005-10-04T02:07:00.000+08:00

秋風起，三蛇肥，放工途經灣仔喜帖街遺址，家下人去樓空、滿目瘡痍、一片蕭條景象，與喜氣洋洋大日子成強烈對比，忽覺內心孤戚戚，正想踱步入空地吟首詩，就見到眼冤野，當堂乜雅慶都冇哂。

唔係撞見仇人或者唐裝冇腳阿伯，講緊嘅係官府呢啲圍板，並非怪圍板阻我去路(圍板無罪!)，係怪圍板上又有「官府風」醜怪「撈稿」(logo)作祟，真係當場嚇到面青，如果有國家級鍊金術師響上面佈陣，應該能交換到屎一督，仲好意思話市區重建，根本已經影響緊市容!

所謂「官府風撈稿」，早前於煲呔撈稿一文都約略拆解過當中密碼，總之蘊含華洋共處、中英文字大雜交、中文毛筆字帶有孔武有力「發發聲」效果、"Dynamic"等精華就為之富「官府風」特色撈稿，當中佼佼者就有康港飛虫及臘鴨會撈稿，真係件件都嚇得死人(有興趣請自行上官府網瀏覽，嚇死自負)，有資格等價交換做米田共有餘；以今趟屎區重建局為例，以佈局古怪藍/綠塊狀物扥底(定還是我慧根唔夠睇唔出內裡玄機?)，洋文"U"字被強行一分為二，依稀見到一個「人」形物體走出，而緊隨其後似有魚鈎狀物體試圖「釣人」，非常邪釘兼唔老黎，定還是個idea係「重建就必須釣(諧音：調?)走啲人」？真係不得而知，就算搵問米婆請達文西上黎都應該拆解唔到當中密碼，官府嘅Idea總係千奇百怪，不能以常理猜度，唔係都唔叫官府。

撈稿如衣服，如果套衫good fit靚仔，真係可以著足一世(千祈咪好似大快活永安旅遊咁換錯衫)，小小一個撈稿，代表企業形象嘅同時亦發放個人風格，從呢類「官府風撈稿」，就睇得出(1)咱們的官府明顯自我形像低落兼自我感覺不良好，缺乏打扮到光鮮企理嘅基本技巧(襯色都襯錯)，開港都有話，人靠衣裝，先敬羅衣後敬人嘛，家下件衫又撞條褲、條褲又撞對鞋、對鞋又撞返件衫，真係撞到嘭嘭聲，最弊官府次次唔係搵錯Stylist就係唔聽人哋支笛，taste屎低俗惡劣仲死要這樣那樣各樣，最後有乜辦法唔笑死狗?

真係唔鬧尤自可，一鬧把九幾火，就剛啱收到一個website(由羅小姐提供)，係來自東瀛切雞好友黑田潔早輪為新宿駅南口地區基盤整備事業所design嘅一個超長圍板......話就話係圍板，實情係圍板嘅同時亦係一個gallery，為圍板賦予多一項功能同可能性，"gallery"分五個section，由六十年代開始到二千年每十年一個section，每個section就以果一年嘅文化大事/產物/符號/有關新宿區開發二三四事嘅剪報，以黑田君嘅撚手插畫串成，例如七十年代嘅名模Twiggy、萬國博覽，八十年代嘅cassette帶、電腦、電影《大白鯊》等等，去到二千年，有哂報導成個重整計劃始末嘅剪報，行到尾仲串到出現椎名林檎首《歌舞伎町之女王》嘅歌詞!!我問你死未?除左睇得出日本人對呢類項目之重視(細微到連Hoarding都絕不馬虎)之外，亦明白人家對文化藝術同切雞係絕對尊重的。

成個項目甚至歡迎平民百姓對開發重整計劃提供好橋，呢啲係咪先為之「質詢」呢?

黑田君襯工人忙著餔圍板時小休片刻

反觀咱們康港，灣仔假假地都算一個著名舊區，一個重建項目都有本事攪到死氣沉沉，悶出鳥來(剩係「喜帖街」呢個theme本身已經夠資格「大造文章」大把野玩)，仲要擺個邪釘撈稿嚇一嚇你先安樂；舊區就好好醜醜點都要開始重建勒，我地呢個千瘡百孔嘅行業，又有冇重建之日呢？

(1)詳情請參考同學仔一連三集的設計相學

The blue pill please !

2005-10-03T19:40:00.000+08:00

「食了藍色那顆藥丸後，你便會忘記一切，返回原本的生活崗位，當一名知足常樂的切雞員 ... ... 」

由夢想當一名創意盡顯，締造美好將來，開闢真文化革命新天地的設計大師 ... ... 到一名在幽暗又氣氛死寂，毫無創作傳統氣候，剽竊成風，拜金拜權的後殖民地上的切雞員。千千萬萬的猙獰恐怖設計作品背後，每個都有段可歌可泣，令人慨嘆不已的悲愴故事。縱然不想成為視覺和文化汚染的幫兇，可是真的「由不得我」！爛市早已成形，無人能阻，多我一個唔多。盡力而為之餘，我不會與自己的肚皮為敵，理想是富貴人家的專利。

「Ignorance is bliss.」更何況「Most of these people are not ready to be unplugged.」

讓我們「龍的傳人」起飛，憑着「一定得精神」，一同遊歷這舒爽和諧沒有爭鬥的極樂吧！